王钢 | 冬日里个丹桂

冬日里个丹桂

王钢

小区对马路是交通公园。公园勿大，只有1.58万平方米。不过建园个日脚倒就是蛮长了，是勒了1954年个辰光。故咾里向树木茂盛，悬铃木、白玉兰、银杏、枫树、丹桂咾啥，品种也勿少。

公园里向有一根大约200米个塑胶跑道。近两年我常庄勒了上头跑步，自称为“溜狗”。跑道个西南转弯角浪，左右有两棵丹桂，用鲁迅笔法写就是左边一棵丹桂，右边也是一棵丹桂。作兴是因为今天天冷得晏，农历八月还呒没开花。一直到国庆节前后刚刚慢慢交结花苞、开花。

大前个礼拜一大清早，我晨跑到转弯角浪，看到假手边个丹桂差勿多快谢勒了，像癞痢头一样粘了几颗花粒粒。当我隔了一圈再跑到搿只转角个辰光，突然之间闻到了一丝静静交个花香，我停下了脚步。

幽香是从跑道正手边转角旁边个丹桂上头透出来个。搿棵丹桂树长得勿高，金黄带点红色花簇疏密相间个坐勒了深绿色个叶子浪。北风吹来，花香带上了一眼冷冷个甜味道。相比较对过个一棵丹桂，伊像煞勒了等待啥物事。

从搿天开始，我隔三差五个会立勒搿棵丹桂前看一息。伊等来了杏叶像黄色个蝴蝶一样一只只飞下来，落到地上就像一张地毯；伊等来了枫树个叶子由绿色变成红色，像一只只小手轻轻个招唤寒风；伊等来了水杉脱脱枯黄个衣衫，一只只鸟窝像长勒了笔直个树干上一样，勒了蓝颜色个天空下特别显眼。

有一天，刮了一夜个大风、落了一夜个大雨。天亮雨一停，我也勿晓得为啥，地浪还呒没干就心急慌忙跑到搿棵丹桂前头。低下头看看地上有勿多个几朵残花，还好勿是老多。朝树上看，还开着交关多个花。花交叶子浪向挂着一滴滴像眼泪个水珠。

我背转身，慢慢个离开了。到今朝再也呒没去看过。跑步到搿只转弯角就低下头，不过像煞总归觉着有一丝静静个芳香。

供稿：原作者 | 责任编辑：牧 野